"Туыстарына аударған": Алматыда мектептердің бірінің бас бухгалтері бюджет қаражатын ұрлаған

Алматы қаласының прокуратурасы мектептерге жүргізілген тексеру қорытындысын жариялады. Бұл туралы қадағалаушы органның ресми сайтына сілтеме жасаған KAZ.NUR.KZ хабарлайды.

Қалалық прокуратураның хабарлауынша, прокурорлар 330 млн теңгеден астам сомаға бюджет қаражаты ұрланғанын анықтады.

Мысалы, Бостандық ауданының прокуратурасы мектептердің бірінде бас бухгалтер жалақыға арналған бюджет қаражатын ұрлағанын анықтаған.

"Бұл құқықбұзушылық мемлекетке 160 млн теңге залал келтіре отырып, мектептің жұмыс істемейтін қызметкерлеріне және өзінің жақын туыстарына ақша аудару жолымен жасалған.

Осыған ұқсас ұрлық фактілерін Медеу, Алмалы, Түрксіб және Алатау аудандарының прокурорлары анықтады", - делінген қалалық прокуратура хабарламасында.

Қадағалаушы орган қазір сотқа дейінгі тергеп-тексеру амалдары жүргізіліп жатқанын атап өтті.

Мәтіннен қате тапсаңыз, бізге жазыңыз