Алматыда балалар кептеліп қалған мектептің директоры жұмыстан босатылды

Әлеуметтік желіде Алматы мектептерінің біріндегі оқушылар кептелісі түсірілген видео жарияланды. Бұл жайтқа білім басқармасы түсініктеме беріп, мектеп басшылығына қандай шара қолданылғанын айтты, деп хабарлайды KAZ.NUR.KZ.

Видеоны Qumash Telegram-арнасы жариялады.

"Алматы мектебінде киім-кешек бөлмесіне бара жатқан жолда бастауыш сынып оқушылары кептеліп қалды. Кейбірі қабырғаға, енді бірі еденге жаншылып қалған", - делінген видео сипаттамасында.

Алматы қаласының білім басқармасы бұл жағдай №41 мектепте болғанын хабарлады.

Ведомство өкілдерінің мәлімдеуінше, бұл мектепте екі ауысымда 1426 оқушы оқиды, жобалық қуаты – 870 орын.

Басқарма өкілдері бұл жағдай 27 ақпанда болғанын мәлімдеді.

"Екінші ауысымнан кейін бірінші қабатта орналасқан мектептің киім ауыстыратын бөлмесінде оқушылар көп жиналды. Мұның себебі – сол күні оқушылардың киіну процесі дұрыс ұйымдастырылмауы.

Бұрын бұл мектепте мұндай жағдай байқалған емес. Мектеп әкімшілігінің мәліметінше, зардап шеккендер жоқ. Оқу процесін ұйымдастыруда бақылауды әлсіреткені үшін мектеп директоры қызметінен босатылды", - делінген басқарма хабарламасында.

Мәтіннен қате тапсаңыз, бізге жазыңыз