"Тағы бір Салтанат": Алматыда ер адамның бұрынғы әйелін аяусыз ұрғаны видеоға түсіп қалды

Алматыда тұрғын үй кешендерінің бірінің бейнебақылау камерасына ер адамның бұрынғы әйелін ұрғаны видеоға түсіп қалған. Бұл туралы KAZ.NUR.KZ "Дети под защитой" қоғамдық қорының жетекшісі Жанна Ахметованың Facebook-тегі парақшасына сілтеме жасап хабарлайды.

"Тағы бір Салтанатты құтқару керек. Әйелдің есімі де - Салтанат. Тұрмысқа шыққанына 11 жылдан кейін әйел ажырасуға шешім қабылдаған. Күйеуінен әрең құтылған ол балаларын алып, Тараздан Алматыға көшкен еді", - деп жазды Жанна Ахметова.

Жанна Ахметованың сөзінше, күйеуі оны аңдып, қайтуға мәжбүрлеген.

"1 сәуірде Life Town тұрғын үй кешенінде әйелге шабуыл жасап, телефонын сындырып, аяусыз ұрып-соққан. Балаларының анасын осындай күшпен ұруға бола ма?", - делінген жазбада.

Бұл оқиғаға қатысты Алматы қалалық полиция департаментінің баспасөз қызметі пікір білдірген.

"Полиция бұл факт бойынша тексеру жүргізді. Жиналған материалдар қылмыстық жауапкершілікке тарту үшін сотқа жіберілді", - деп хабарлады ПД өкілдері.

Айта кетейік, 12 сәуірде Алматыда ер адам орындықта отырған әйелге тап беріп, күш көрсеткен еді.

Еске сала кетейік, 11 сәуірде тұрмыстық зорлық-зомбылыққа қатысты заң сенатта мақұлданған болатын.

Мәтіннен қате тапсаңыз, бізге жазыңыз