Алматы облысында пара алды деген күдіктіге электронды білезік тағылды

Алматы облысында алғаш рет күдіктіні бақылау үшін электронды білезік қолданылды. Бұл туралы облыстық сотқа сілтеме жасаған KAZ.NUR.KZ хабарлайды.

Соттық Facebook желісіндегі ресми парақшасында жарияланған мәліметке сүйенсек, Алматы облысының Іле аудандық сотында елеулі мөлшерде пара алды деп айыпталған адамға (Қылмыстық кодекстің 366-бабының 2-бөлігі) қатысты үй қамағына алу түріндегі бұлтартпау шарасына санкция беру жөніндегі материал қаралды.

"Сот қаулысымен сотталушыға электронды бақылау құралдарын (электронды білезік) қолдана отырып, үй қамағына алуға санкция берілді және оған осы құралды өзімен бірге алып жүру міндеті жүктелді", - делінген сот хабарламасында.

Қаулы заңды күшіне енді.

Айта кетейік, бұған дейін Маңғыстау облысында жоғары лауазымды тұлғаға электронды білезік тағылған. Антикордың мәліметінше, ол 5 миллион теңге сомасында пара алды деген күдікке ілінген.

Мәтіннен қате тапсаңыз, бізге жазыңыз