Қызылорда облысында келініне бейәдеп сөздер айтқан әйел қамауға алынды

Қызылорда облысының тұрғыны келініне балағат сөздер айтқаны үшін жазаланды. Бірнеше күн қамауға алынғанымен қатар, оған ішімдік ішуге тыйым салынды, деп хабарлайды облыстық сотқа сілтеме жасаған KAZ.NUR.KZ.

Cоттың Telegram-дағы ресми арнасында пайда болған ақпаратқа сәйкес, Арал аудандық сотында азаматша Б.-ға қатысты Қазақстан Республикасының ӘҚБтК-нің 73-бабының 2-бөлігімен әкімшілік құқық бұзушылық туралы іс қаралды.

Сотта анықталғандай, азаматша Б. үйіне алкогольдік ішімдік ішіп, мас күйінде келген. Ол отбасындағы адамдарға сыйламаушылық көрсетiп, келініне балағат сөздер айтқан, сондай-ақ, мазасын алып, жанұя шырқын бұзған.

Ол бұған дейін 2024 жылдың 11 сәуірінде осы тектес әрекеті үшін ӘҚБтК-нің 73-бабының 1-бөлігімен әкімшілік жазаға тартылып, ескерту алса да, еш нәтиже шығармай, құқықбұзушылықты қайталап жасаған.

"Сотта жәбірленуші мұндай жағдай жиі болып тұратынын айтып, оған жаза қолдануды сұраған. Б-ның құқықбұзушылық әрекеті өзінің кінәсін мойындаған жауабымен, сондай-ақ сотта зерттелген іс құжаттарымен толық дәлелденген", - делінген хабарламада.

Сот қаулысымен Б. жоғарыда аталған баппен кінәлі деп танылып, 10 тәулік мерзімге әкімшілік қамаққа алу жазасы тағайындалды.

Сонымен қатар АПБ-нің ерекше талап белгілеу туралы ұсынысы қанағаттандырылып, Б-ның мінез-құлқына 3 ай мерзімге алкогольдік ішімдік ішуге, есірткі, психотроптық заттарды қолдануға толық көлемде тыйым салуды міндеттейтін ерекше талап белгіленген.

Мәтіннен қате тапсаңыз, бізге жазыңыз