ҰҚК қызметкерлері Шымкентте екі азаматты қылмыс үстінде ұстады (видео)

Биыл қазанда ҰҚК Шымкент қаласы бойынша департаменті прокуратура органдарының үйлестіруімен синтетикалық есірткі өндірісіне қатысты жасырын зертхана әрекетінің жолын кесті. Бұл туралы KAZ.NUR.KZ ҰҚК-ның Telegram-дағы арнасына сілтеме жасап хабарлайды.

Ведомство мәліметінше, есірткі затының кезекті партиясын дайындап жатқан кезде Қазақстанның екі азаматы ұсталып, соттың санкциясымен қамауға алынған.

"10 кг жуық дайын және 60 литр "а-PVP" сұйық психотроптық заты мен 240 литр прекурсор, сондай-ақ есірткі дайындауға арналған зертханалық жабдықтар тәркіленді", - делінген хабарламада.

Қылмыстық кодекстің 297-бабының 3-бөлігі бойынша сотқа дейінгі тергеп-тексеру жүргізіліп жатыр. Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды.

Айта кетейік, қылмыстық кодекстің 297-бабының 3-бөлігіне сәйкес, есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу:

1) адамдар тобының алдын ала сөз байласуымен; 

2) бірнеше рет; 

3) аса iрi мөлшердегі есірткі, психотроптық заттарға, сол тектестерге қатысты жасалған; 

4) лауазымды адам қызмет бабын пайдалана отырып жасаған; 

5) электрондық ақпараттық ресурстарды пайдалану арқылы; 

6) қоғамдық орында жасалған іс-әрекеттер – 

мүлкi тәркiленiп, он жылдан он бес жылға дейiнгi мерзiмге бас бостандығынан айыруға жазаланады.