"11 жыл жасырынып жүрген": халықаралық іздеуде болған шетел азаматы Шымкентте қолға түсті

Шымкентте халықаралық іздеуде жүрген шетел азаматы ұсталды. Бұл туралы KAZ.NUR.KZ ІІМ-нің медиа-порталына сілтеме жасап хабарлайды.

Экстремизмге қарсы іс-қимыл басқармасының қызметкерлері "Құқықтық тәртіп" жедел-профилактикалық іс-шарасы барысында 41 жастағы шетел азаматын қолға түсірді.

Ер адамға кеден заңнамасын бұзғаны және пара алғаны үшін көрші елдің құқық қорғаушылары халықаралық іздеу жариялаған.

"Ол қылмыстық қудалаудан 11 жыл бойы жасырынып жүрген. Қазіргі таңда ер адам қамауға алынды. Оны экстрадициялау бойынша жұмыстар жүргізіліп жатыр", - делінген хабарламада.

Еске салайық, Шымкентте полицейлер 8 жыл бойы халықаралық іздеуде болған ер адамды ұстаған еді. 41 жастағы азамат соттың шешімімен республика аумағынан аластатылып, бес жылға дейін Қазақстанға кіргізілмейтін болды.