15 жыл іздеуде болған екі шетел азаматы Түркістан облысында ұсталды

Түркістан облысы экстремизмге қарсы іс-қимыл басқармасының қызметкерлері 15 жыл мемлекетаралық іздеуде болған екі шетел азаматын ұстады. Бұл туралы KAZ.NUR.KZ Polisia.kz порталына сілтеме жасап хабарлайды.

Полицейлер 2009 жылдан бері бірқатар ауыр қылмыс жасағаны үшін өз отанында іздеуде жүрген көрші мемлекеттің екі азаматын Түркістан облысының аумағында қолға түсірген.

"Қазіргі уақытта іздеуде жүрген шетелдіктер ұсталып, уақытша ұстау изоляторына қамауға алынды. Барлық жағдай анықталып жатыр", - делінген полиция хабарламасында.

Еске салайық, 11 жыл бойы қылмыстық қудалаудан жасырынған шетел азаматы Шымкентте ұсталған еді. Ер адамға кеден заңнамасын бұзғаны және пара алғаны үшін көрші елдің құқық қорғаушылары халықаралық іздеу жариялаған.

Сондай-ақ Шымкентте полицейлер 8 жыл бойы халықаралық іздеуде болған ер адамды ұстағанын жазғанбыз. 41 жастағы азамат соттың шешімімен республика аумағынан аластатылып, бес жылға дейін Қазақстанға кіргізілмейтін болды.