Шымкентте мефедрон сатқан азамат 11 жылға бас бостандығынан айырылды

Шымкентте мефедрон сатқан азамат 11 жылға бас бостандығынан айырылды. Бұл туралы Otyrar.kz хабарлайды.

Басылым мәліметінше, Шымкент қаласының қылмыстық істер жөніндегі мамандандырылған ауданаралық сотында Қылмыстық кодекстің 297-бабы 3-бөлігінің 3-тармағы, 296-бабының 3-бөлігі (психотропты заттар мен сол тектестерді ірі мөлшерде өткізу мақсатынсыз иемдену, сақтау, тасымалдау) айыпталған Қ.-ға қатысты іс қаралған.

"Сотталушы 2024 жылдың наурыз айында Шымкент қаласы Ахмет Байтұрсынов көшесінің бойында "Данияр" бүркеншік атты тұлғаға массасы 1,92 грамм болған психотропты заттың аналогы – мефедронды өткізген және оның автокөлігін тінту кезінде салоннан қалған 0,35 грамм мефедрон тәркіленіп алынған",- делінген хабарламада.

Аталған факті куәгерлердің жауаптары, заттай дәлелдемелер, сот сараптамаларының тұжырымдары арқылы дәлелденді.

Прокурор Қ. есімді азаматқа бас бостандығынан айыру жазасын тағайындауды сұрады. Ал сотталушы өз әрекетін Қылмыстық кодекстің 296-бабы 4-бөлігіне қайта саралап, оған бас бостандығынан айырмайтын жаза тағайындауды өтінген.

Сот сотталушыны Қылмыстық кодекстің 297-бабы 3-бөлігінің 3-тармағы, 296-бабы 3-бөлігі бойынша кінәлі деп танып, оған қылмыстар жиынтығы бойынша 11 жыл мерзімге бас бостандығынан айыру жазасын тағайындады. Үкім заңды күшіне енген.

Мәтіннен қате тапсаңыз, бізге жазыңыз