Ақмола облысында екі апта бұрын жоғалған азамат даладан өлі күйінде табылды

Ақмола облысында 14 қараша күні жоғалған 24 жастағы тұрғынды іздестіру жұмыстары тоқтатылды. Оның денесі даладан табылды, деп хабарлайды KAZ.NUR.KZ өңірлік полицияға сілтеме жасап.

Ақмола облыстық полиция департаменті KAZ.NUR.KZ тілшісіне өңірде із-түссіз жоғалған ерекше қажеттілігі бар адамды іздестіру жұмыстары аяқталғанын хабарлады. Оның денесі далада табылған.

"Р.А ұшты-күйлі жоғалғаны туралы ақпарат биыл 19 қарашада Біржан сал атындағы аудандық полиция бөліміне түскен. Туыстарының айтуынша, 24 жастағы азамат 14 қараша күні жоғалған. Алайда туыстары бастапқы күндері өз бетінше іздеу жұмыстарын жүргізіп, тек бесінші күні ғана полицияға жүгінген.

Ата-анасы жоғалған жігіттің осыған дейін көрші ауылдағы туыстарына қыдырып барып жүргенін айтқан. Жедел түрде іздестіру жұмыстары ұйымдастырылып, полиция қызметкерлері мен еріктілерден арнайы топ құрылған. Олар орман массивтерін, даланы және жақын маңдағы елдімекендерді аралаған. Іздестіру аумағын көбейту үшін дрондар мен қызмет көлігі пайдаланылған", - деді полицияда.

Із-түссіз жоғалған азаматтың денесін полицейлер тапты. Алғашқы тексеруде оның үсіктен қайтыс болғаны анықталды. Өлімнің нақты себебін сараптама анықтайды.

Мәтіннен қате тапсаңыз, бізге жазыңыз