Шымкентте лауазымды тұлғалар бюджеттен 1 млрд теңгеден астам қаражат жымқырған

Шымкенттік лауазымды тұлғалар мен "Қуатжылуорталық-3" мекемесінің өкілдері бюджеттен 1 млрд теңгеден астам қаражатты жымқырған. Олар жобаның сметалық құнын арттырып, қаладағы жылу мен электр беру желілерін жөндеуге бөлінген мемлекет қаржысына қол салған. Сот үкімімен барлық жеті айыпталушы 2 жылдан 7,5 жылға дейін бас бостандығынан айырылды, деп хабарлайды Otyrar.kz.

"Сонымен қатар, күдіктілер лауазымды адамдар ұрланған қаражатты жылыстату үшін "қолма-қол ақша жасаушылар" тобын тартты.

Олар 7 пайыз мөлшерінде ақшалай сыйақы үшін бөгде тұлғаларға ресімделген 24 күмәнді кәсіпорын арқылы тауарларды жеткізу және қызмет көрсету жөніндегі мәмілелер туралы жалған құжаттар (шот-фактуралар, жүкқұжаттар, орындалған жұмыс актілері, шарттар) ұсынды", - деді Шымкент қаласы бойынша ЭТД-нің өкілі.

Нәтижесінде бюджеттен жымқырылған 358 млн теңгеден астам қаражатқа сатып алынған жылжымайтын мүлік мемлекетке қайтарылды.

Атап айтқанда, Шымкент және Астана қалаларындағы 2 пәтер мен 1 тұрақ орны, үшінші мегаполистегі 3 жеке үй және банк шоттарындағы тыйым салынған 50 миллион теңге тәркіленді.

Мәтіннен қате тапсаңыз, бізге жазыңыз