Антикор Шымкенттің туризм саласына қатысты тексеріс бастады

Шымкент қаласының Сыбайлас жемқорлыққа қарсы қызметі туризм саласындағы сыбайлас жемқорлық тәуекелдеріне сыртқы талдауды бастады. Бұл туралы агенттіктің Шымкент қаласы бойынша департаменті хабарлайды.

Антикор сайтындағы ақпаратқа сүйенсек, Сыбайлас жемқорлыққа қарсы іс-қимыл агенттігінің Шымкент қаласы бойынша департаменті заңдылық пен тәртіпті қамтамасыз ету мақсатында туризм саласындағы сыбайлас жемқорлық тәуекелдеріне сыртқы талдауды бастаған.

Алдағы уақытта Шымкент қаласының туризм, сыртқы байланыстар және креативті индустрия басқармасы мен Visit Shymkent туристік ақпараттық орталығының қызметі талданады.

Талдау барысында бюджетті жоспарлау және игеру, туроператорлық қызметті лицензиялау, шығындарды өтеу және кәсіпкерлерді субсидиялау мәселелерін зерделеу жоспарлануда.

Департамент қызметкерлерімен қатар, талдауға мүдделі мемлекеттік органдардың сарапшылары мен азаматтық қоғам өкілдері тартылып жатыр.

Сыбайлас жемқорлық тәуекелдері туралы ақпаратты немесе осы саланы жетілдіру бойынша ұсыныстарды kaldybaev.n@antikor.gov.kz электронды поштасына немесе WhatsApp (+7 771 518 68 34) мессенджеріне жолдай аласыздар.

Мәтіннен қате тапсаңыз, бізге жазыңыз