Алматыда іздеу жарияланған 20 жастағы ана сәбиімен бірге басқа қаладан табылды

Алматыда 6 желтоқсанда 20 жастағы ана сәбиімен ата-анасының үйінен шығып кетіп, оралмаған. Ол келесі күні Ақтау әуежайынан табылды, деп хабарлайды ІІМ ақпараттық-медиа порталына сілтеме жасаған KAZ.NUR.KZ.

Алматыда 6 желтоқсанда 20 жастағы жас ана сәбиін алып, үйден шығып кетіп, қайта оралмаған. Ол ата-анасымен бірге тұратын үйінен белгісіз бағытта кетіп қалған.

Оны іздестіру туралы Алматы қаласының 44 жастағы тұрғыны полицияға хабарлаған. Хабар түсе салысымен көлік полицейлері дереу іздестіру жұмыстарын бастап, жедел әрекетке кірісті.

7 желтоқсанда Ақтау қаласы әуежайын патрульдеу кезінде желілік полиция бөлімшесінің қызметкерлері жоғалған әйел мен оның сәбиін анықтады. Екеуі де аман-есен табылып, жеке басы тексерілгеннен кейін ата-анасының қолына тапсырылған.

"Жас ананың ата-анасы көлік полицейлеріне дер кезінде көмек көрсеткені үшін алғысын білдірді. Сақшылардың жедел әрекеті арқасында жас ана мен сәбиінің жағдайы жақсы", - делінген хабарламада.

Мәтіннен қате тапсаңыз, бізге жазыңыз