"Табуға көмектескендерге сыйақы уәде етілген": шымкенттік бұрынғы "антикор" қызметкері ұсталды

Шымкент қаласы бойынша сыбайлас жемқорлыққа қарсы іс-қимыл департаменті бастығының бұрынғы орынбасары, бұған дейін іздеу жарияланған Дәуренбек Қожабаев ұсталды. Бұл туралы KAZ.NUR.KZ Антикордың баспасөз қызметіне сілтеме жасап хабарлайды.

Құзырлы орган мәліметінше, Антикор өкілдері Шымкент қаласы бойынша аумақтық басқармасы бастығының бұрынғы орынбасары Дәуренбек Қожабаевқа қатысты қылмыстық істі тергеп жатыр.

Ол қаладағы орта мектептердің бірінің директорынан оны қылмыстық жауапкершіліктен босатқаны үшін пара алды деген күдікке ілінген.

Биыл шілде айында Қожабаевқа халықаралық іздеу жарияланған болатын. Кейін Антикор іздеуде жүрген бұрынғы қызметкерін табуға көмектескендерге сыйақы берілетінін хабарлаған болатын. Агенттік өкілдері анонимдікке кепілдік берген еді.

"30 қарашада Сыбайлас жемқорлыққа қарсы іс-қимыл агенттігінің Ұлттық қауіпсіздік комитетімен бірлесіп жүргізген жедел іздестіру шараларының нәтижесінде ол ұсталып, уақытша ұстау изоляторына қамалды", - деді Антикор өкілдері.

Тергеу жалғасып жатыр.