Шымкентте көшеде іш киіммен жарнамаға түскен тұрғын жауапқа тартылды

Шымкентте көшеде іш киіммен жарнамаға түскен тұрғын жауапқа тартылды. Бұл туралы KAZ.NUR.KZ Шымкент соттарының Telegram-дағы арнасына сілтеме жасап хабарлайды.

Шымкент қаласының әкімшілік құқық бұзушылықтар жөніндегі мамандандырылған ауданаралық сотында қала тұрғынына қатысты Әкімшілік құқық бұзушылық туралы кодекстің 434-бабы 1-бөлігі (қоғамдық орындарда айналасындағыларға құрметпен қарамауды бiлдiретiн, қоғамдық тәртiп пен жеке тұлғалардың тыныштығын бұзатын әрекеттер ) бойынша әкімшілік іс қаралған.

"Е. 2024 жылдың қараша айында Шымкент қаласындағы Әл-Фараби алаңында орналасқан Shymkent Plaza сауда үйінің алдында жартылай жалаңаш күйде іш киіммен жарнамаға түскен", - делінген хабарламада.

Сотта тұрғын кінәсін мойындап, өкінетінін, өзіне қатаң жаза қолданбауын сұрады.

"Е.-нің әкімшілік құқықбұзушылық әрекеті әкімшілік құқықбұзушылық туралы хаттама, түсініктеме және іске тіркелген бейнежазба арқылы бекітілген", - делінген сот хабарламасында.

Сот тұрғын өз әрекетінің құқыққа қарсы сипатын сезініп, саналы түрде жол бергендіктен әкімшілік құқықбұзушылықтарды қасақана жасаған деп танып, оған 5 (бес) тәулік мерзімге әкімшілік қамаққа алу жазасы тағайындады.

Сот қаулысы заңды күшіне енбеген.

Мәтіннен қате тапсаңыз, бізге жазыңыз