Екібастұздағы ауруханалардың бірінде зейнеткер 13 млн теңгесінен айырылып қалды

Екібастұздағы ауруханалардың бірінде зейнеткер 13 млн теңгесінен айырылып қалды. Бұл туралы Kazinform хабарлайды.

Басылым мәліметіне сүйенсек, Екібастұз полициясына зейнеткер әйел хабарласып, банктегі шотынан белгісіз біреу 13 млн теңге сомасында ақша қаражатын ұрлағанын жеткізген. 

"Полиция аталған қылмысты ашуға бағытталған іс-шаралар қабылдады. Жедел-іздестіру іс-шараларын жүргізу барысында зейнеткердің биылғы 28 қараша – 2 желтоқсан аралығында аурухананың инсульт бөлімшесінде емделгені анықталды.

Онымен бірге палатада бірнеше пациент болған. Полицейлер әлгі палатада зейнеткердің банктік мобильді қосымшасына заңсыз кіріп, шотынан ақша ұрлаған жас әйелді анықтады. Күдікті кінәсін мойындап отыр", - деп хабарлады Павлодар облысы полиция департаментінің баспасөз қызметі.

Тәртіп сақшылары ұрлық дерегі бойынша қылмыстық іс қозғады. Күдіктіге қатысты бұлтартпау шарасы тағайындалды.