ҚМА: Қазақстаннан жарты миллионнан астам долларды заңсыз әкетпек болған

Қазақстанда жыл басынан бері жалпы сомасы жарты миллион доллардан асатын декларацияланбаған валютаны заңсыз әкетудің 17 әрекеті анықталды. Бұл туралы KAZ.NUR.KZ Қаржылық мониторинг агенттігіне сілтеме жасап хабарлайды.

Жыл басынан бері Еуразиялық экономикалық одақтың кедендік шекарасы арқылы декларацияланбаған валютаны заңсыз өткізудің 17 фактісі анықталды.

"Анықталған валютаның жалпы сомасы 529 152 АҚШ доллары мен 9 500 еуроны құрады.

Оның ішінде 15 жағдай Алматы қаласында, 2 жағдай Маңғыстау облысында тіркелген", - делінген хабарламада.

Экономикалық және қаржылық қауіпсіздікті қамтамасыз ету, контрабандаға қарсы күрес және заң мен тәртіпті сақтау мақсатында агенттік жұмысына қызметтік-іздестіру иттері де көмек көрсетті.

Ағымдағы жылдың басынан бері агенттік иттердің көмегімен есірткіні заңсыз тасымалдаудың 33 фактісін анықтады.

Табылған есірткінің жалпы салмағы 17 келі, оның ішінде:

• марихуана/каннабис – 5,2 кг. (20 факт);
• гашиш/гашиш майы – 11,5 кг. (11 факт);
• көкнәр сабаны, тетрагидроканнабинол және басқа да синтетикалық есірткі түрлері.

Еске салайық, 2023 жылы кинологиялық орталық мамандары есірткі транзитінің 29 фактісін және валютаны заңсыз шығару әрекетінің 18 фактісін анықтаған.

Кинологиялық орталықта мемлекеттік кірістер және құқық қорғау органдарының қызметкерлерінен, сондай-ақ Ауғанстан, Өзбекстан, Қырғызстан, Түркіменстан, Тәжікстан және Моңғолиядан келген 1000-нан астам кинологтар оқытылды.

Тек соңғы екі жылдың ішінде орталық 60-тан астам кинологиялық бригаданы дайындады.