Астанада үй қызметкері 10 млн теңгенің зергерлік бұйымдарын ұрлады деген күдікке ілінді

27 жастағы Астана тұрғыны құны 10 миллион теңге тұратын зергерлік бұйымдарды ұрлады деген күдікке ілінді. Бұл туралы Ішкі істер министрлігінің Polisia.kz ақпараттық порталына сілтеме жасаған KAZ.NUR.KZ хабарлайды.

Ішкі істер министрлігінің хабарлауынша, полицейлер тұрғын үйді тонаған 27 жастағы күдіктіні анықтады.

"Әйел жәбірленушінің үйінде көмекші болып жұмыс істеген, ол үй иесінің сенімін пайдаланып, алты ай бойы аптасына екі рет барып, бірнеше рет зергерлік бұйымдарды ұрлап, кейін оны ломбардқа сатып жіберген.

Келтірілген шығынның жалпы сомасы 10 миллион теңгені құрады. Сондай-ақ, ұрланған құндылықтардың ішінде Tiffany сырғалары мен Casato брендінің гауһар тасты сақинасы бар екені белгілі болды. Аталған факті бойынша қылмыстық іс қозғалып, тергеу жүріп жатыр", - деп хабарлады Ішкі істер министрлігі.

Еске салсақ, бұған дейін Астанада шетелдіктер ломбардтан 46 миллион теңгенің алтынын ұрлады деген күдікке ілінді.