Бортсерікке қол көтерді деген FlyArystan жолаушысы уақытша ұстау изоляторына қамалды

Астана әуежайының желілік полиция бөлімінің қызметкерлері Астана-Өскемен рейсінің 47 жастағы жолаушысын ұстады. Ол алкогольге мас күйде бортсеріктің ішінен ұрып, ұшақ бортынан шығарда "бомба" деп айқайлаған. Бұл туралы Көліктегі полиция департаментінің баспасөз қызметі хабарлады.

Оқиға туралы Facebook желісінде блогер Азамат Ерғалиев жазды. Ол да дәл сол рейспен Өскеменге ұшпақ болған.

"Астана - Өскемен бағытындағы FlyArystan рейсіне отырғаннан кейін жолаушы бортсерікті ұрып жіберді. 50 жас шамасындағы ер адам жолаушыларға да ыңғайсыздық туғызды. Полиция шақырылды. Бір адамның кесірінен рейс кейінге шегерілді", - деп жазады автор.

Көліктегі полиция департаменінің баспасөз қызметі берген ақпаратқа сәйкес, аталған факт бойынша бұзақылық және терроризм актісі туралы көрінеу жалған хабарлауға қатысты қылмыстық істер қозғалды.

"Әуе кемесіне дереу тексеру жүргізіліп, оның барысында жарылғыш құрылғылар мен басқа да тыйым салынған заттар табылмады. Мұндай мінез-құлыққа жол берілмейді.

Жағдайды тұрақсыздандыру немесе қорқыту әрекеттері көлікте елеулі қатер ретінде қарастырылады және кінәлілер заң шеңберінде жауапкершілікке тартылады.

Күдікті уақытша ұстау изоляторына қамалды", - делінген хабарламада.

Мәтіннен қате тапсаңыз, бізге жазыңыз