Ұлттық ұлан офицері жүрек талмасы ұстаған қызды құтқарып қалды

Ұлттық ұланның әскери қызметшісі патрульдеу кезінде жүрек талмасы ұстаған қызды құтқарып қалды, деп хабарлайды Polisia.kz.

Ақпараттық медиа-порталдың жазуынша, оқиға Ақтөбе қаласының халық көп шоғырланған аудандарының бірінде болған.

Сағат 23:30 шамасында Әбілқайыр хан көшесіндегі банк ғимаратының маңында белгісіз бір адам автопатрульдегі әскери қызметшілерге тротуарда қыздың ес-түссіз жатқанын хабарлаған.

Мұны естіген әскери жасақ кезекшісі дереу оқиға орнына жеткен. Анықтау барысында қыздың есінен танып қалғаны белгілі болған. Куәгердің айтуынша, жедел жәрдем бес минут бұрын шақырылған.

Дегенмен әскери жасақ кезекшісі Дмитрий Муравицкий уақыт жоғалтпай зардап шегушіні жақын маңдағы ауруханаға өзі жеткізуге шешім қабылдаған. Әскери қызметшінің жедел әрекеттерінің арқасында қыз тез арада Ақтөбе қаласының көпсалалы облыстық ауруханасына жеткізіліп, кезекші дәрігерге табысталған.

Тексеруден кейін дәрігер қызда жүрек талмасы болғанын анықтаған. Қазіргі уақытта оның жағдайы қанағаттанарлық.

"Біздің әрқайсысымыз кез келген қиын жағдайда көмекке келуге дайын болуымыз керек. Бұл бір батырлықты қажет етпейді, тек жауапкершілік болса жеткілікті", - деді Дмитрий Муравицкий.

Айта кетейік, бұған дейін әскери оқу орнының курсанты Риддерде өрт шыққан пәтерден ер адамды құтқарып қалғанын жазған едік.

Мәтіннен қате тапсаңыз, бізге жазыңыз