"Қонаевта оқушы аяусыз соққыға жығылған": әкімдік өкілдері ақпаратты жоққа шығарды
Жарияланған күні:

Қонаев қаласының әкімдігі кәмелет жасқа толмаған баланы сыныптастары өлімші етіп сабағаны туралы ақпаратты жоққа шығарды. Оқушы антисептиктен уланып, ауруханаға жеткізілген, деп хабарлайды KAZ.NUR.KZ тілшісі.
Білім бөліміндегілер орта мектеп-гимназиясындағы тәртіптік жағдайға қатысты комиссия құрған. Оқушы антисептиктен уланды деген диагнозбен ауруханаға түскен. Қазіргі таңда жағдайы жақсы, ем қабылдап жатыр.
Оқушының анасы да төбелес болғанын жоққа шығарып, видео түсірген.
"Осы жылдың 31 қаңтарында кәмелетке толмаған ұлым жергілікті ауруханаға түсті. Қаланың кіреберіс көпірінің астында ұлымды ешкім соққыға жыққан жоқ және ешқандай топтық төбелес болған жоқ", - дейді Ажар Дәмренова есімді әйел бейнежазбада.
Қонаев әкімдігі журналистерден және Қазақстан халқынан ресми ақпарат көздеріне ғана сенуін сұрайды. Жалған ақпарат тарату үшін заңнама аясында әкімшілік жаза қарастырылғанын еске салады.
Сондай-ақ олар Қонаевта бұған дейін көпірдің астында төбелес болғаны туралы дерек тіркелмегенін айтты. Өзіне-өзі қол жұмсамақ болған бала оқуда озат, ортасында сыйлы оқушы болған.
Еске сала кетейік, бұған дейін журналист Гүлмира Әбіқай Instagram желісіндегі парақшасында Қонаев қаласының 9-сынып оқушылары өз сыныптасын қала көпірінің астында ұрып-соққанын жазған еді.
Алматы облысы полиция департаментінің баспасөз қызметі "Өз-өзіне қол жұмсауға итермелеу" дерегі бойынша қылмыстық іс қозғалғанын хабарлады.
"Қазіргі уақытта оқиғаның мән-жайын толық және жан-жақты тексеру үшін барлық қажетті тергеу әрекеті жүргізіліп жатыр.
Көрсетілген жұмыс аясында іс бойынша нақты процессуалдық шешім қабылданады. Тергеу мүддесіне байланысты басқа ақпарат жария етілмейді", - делінген полиция хабарламасында.
Мақаланың түпнұсқасы: https://kaz.nur.kz/accidents/crime/2217852-qonaevta-oqushy-aiausyz-soqqyga-zhygylgan-akimdik-okilderi-aqparatty-zhoqqa-shygardy/