Жамбыл облысында полиция бөлімі бастығының орынбасарына қатысты тергеу басталды

Жамбыл облысының прокурорлары ауыр қылмысты жасыру фактісі бойынша сотқа дейінгі тергеп-тексеру бастады, деп хабарлайды KAZ.NUR.KZ облыстық прокуратураға сілтеме жасап.

Ведомствоның ресми сайтындағы мәліметке сүйенсек, Байзақ ауданы полиция бөлімі бастығының орынбасарына қатысты Қылмыстық кодекстің 433-бабының 2-бөлігі бойынша ауыр санаттағы қылмысты қасақана жасырды деген күдікпен сотқа дейінгі тергеп-тексеру басталған.

"Қылмысты жасыру аудан аумағында орын алған 10 700 000 теңге қаражатты жымқыруға қатысты арызды сотқа дейінгі тергеп-тексерулердің бірыңғай тізіліміне тіркемеу арқылы жүзеге асырылған.

Жиналған дәлелдемелердің жиынтығымен күдіктінің іс-әрекеті ҚК-нің 433-бабы 3-бөлігінің 2) тармағымен сараланды (ауыр қылмысты адамдар тобының алдын ала сөз байласуымен жасыру).

Күдікті полиция қызметкері ҚПК-нің 128-131-баптарының тәртібімен  ұсталып, оған қатысты сотпен "күзетпен ұстау" түріндегі бұлтартпау шарасы санкцияланды", - делінген хабарламада.

Хабарламада сотқа дейінгі тергеп-тексеру жалғасып жатқаны, ҚПК-нің 201-бабына сәйкес өзге ақпарат жарияланбайтыны айтылған.

"Прокуратура құқық бұзушылықтарды тіркеу кезінде есепке алу-тіркеу тәртібін сақтаудың маңыздылығына баса назар аударады және қылмысты есептен жасыру үшін 10 жылға дейінгі мерзімге бас бостандығынан айыру түріндегі жаза көзделгенін ескертеді", - делінген хабарламада.