Шымкентте 2009 жылы аса ауыр қылмыс жасады деген күдікті ұсталды

Шымкентте адам өлтірді деген күдікті 16 жылдан кейін ұсталды. Ол осы уақытқа дейін іздеуде болған, деп хабарлайды KAZ.NUR.KZ Шымкент қаласы прокуратурасының ресми сайтына сілтеме жасап.

Шымкент қаласы прокуратурасы Полиция департаменті қызметкерлерімен бірлесе жүргізген жедел-іздестіру іс-шараларының нәтижесінде адам өлтiру бабымен күдікке ілінген тұлға ұсталды.

Қалалық прокуратура өкілдерінің хабарлауынша, 2009 жылы 9 қаңтарда "Астория" кафесінің жанында А. есімді азамат суық қарумен аса ауыр қылмыс жасады деген күдікке ілінген, аталған тұлға осы уақытқа дейін тергеуден жасырынған.

"Күдікті 16 жылдан астам уақыт бойы халықаралық іздеуде болған. Қазіргі уақытта күдікті уақытша ұстау изоляторына қамалды, сотқа дейінгі тергеп-тексеру жүргізіліп жатыр", - дейді прокуратура өкілдері.

Мәтіннен қате тапсаңыз, бізге жазыңыз