Павлодарда мектеп күзетшісі оқушыны ұрды деген күдікке ілінді

Павлодарда мектеп күзетшісі алтыншы сынып оқушысын ұрды деген күдікке ілінді. Ер адам мас күйде болған, деп хабарлайды облыстық полиция департаментіне сілтеме жасаған KAZ.NUR.KZ.

Павлодардағы мектептердің бірінде баланың денесіне зақым келтіру фактісі бойынша полиция тергеу жұмыстарын бастады.

Ведомствоның мәліметінше, 19 ақпанда мектеп күзетшісі мас күйде 6-сынып оқушысының кеуде тұсынан ұрған көрінеді.

Салдарынан кәмелетке толмаған бала ауруханаға түсті.

"Сот-медициналық сараптама тағайындалды, оның қорытындысы бойынша процессуалдық шешім қабылданады. Сонымен қатар оқиғадан кейін күзетші медициналық айықтыру мекемесіне орналастырылды. Ол қоғамдық орында мас күйде жүргені үшін жауапкершілікке тартылып, айыппұл салынды", - деп хабарлады ПД баспасөз қызметі өкілдері.

Сондай-ақ полиция күзетшінің жұмыс орнында осындай күйде болуына жол берген мектеп басшылығын жауапкершілікке тарту туралы облыстық білім басқармасына ұсыныс жіберген.