Танысының басынан атқан: Астанада тұрғын үйлердің бірінде қайғылы жайт болды

Астанада ер адамдардың арасындағы жанжал қайғылы жайтқа ұласқан. Салдарынан бір адам қаза тапты. Ер адам танысының басынан атқан, деп хабарлайды КТК телеарнасы.

Өлімге әкеп соққан жанжал Астанадағы тұрғын үйлердің бірінде болған. Көршілерінің айтуынша, күдікті 50 жастан асқан отбасылы азамат екен. 

"Бала-шағасымен осы үйде тұратын. Жап-жақсы жігіт болған. Ішімдік ішпейтін, жаман әдеті болмаған. Намазын оқып, әрқашан амандасып тұратын. Ал сырттан келген жұмыстасы бірдеңе шегіп келген көрінеді. Нақтысын білмеймін, тергеушілерден естігенім осы", - дейді көршісі.

Қайғылы оқиға кеше сағат кешкі сағат бес жарым шамасында болды. Көршісінің айтуынша, күдікті мен марқұм әріптес болған.  Екеуі жанжалдасып, ақыры соңында бірі мылтыққа жармасып  басынан дәлдеп атқан дейді. Оқиға орнына полиция мен жедел жәрдем шұғыл жеткенімен, ол адам бірден жан тапсырды. Қазір әріптестер арасындағы қанды оқиғаның себеп-салдары анықталып жатыр.

"Қылмыстық іс қозғалды. Күдікті ұсталып, уақытша ұстау изоляторына қамалды. Қылмыс құралы тәркіленді. Алдын ала берілген мәлімет бойынша, қылмыс бұрыннан таныс арасында  жанжал туындауы барысында жасалған. Ұрыс салдарынан күдікті қайтыс болған адамның басынан атқан. Оқиғаның барлық мән жайын анықтауға бағытталған тергеп-тексеру жүргізіліп жатыр", - дейді Астана ПД  баспасөз қызметінің жетекшісі Эльмира Шәуленова.

Дереккөз: КТК телеарнасы

Мәтіннен қате тапсаңыз, бізге жазыңыз