Танысу сайттары арқылы жігіттерді алдап, тонады деген күдікпен Алматыда бір топ адам ұсталды

Алматыда танысу сайттары арқылы ер адамдарды алдап, тонап келді деген күдікпен 26 адам ұсталды. Бұл туралы KAZ.NUR.KZ ІІМ-нің Polisia.kz ақпараттық медиа-порталына сілтеме жасап хабарлайды.

Басылым күдіктілердің әрекет ету схемасы қарапайым екенін, бірақ олар үшін өте тиімді болғанын жазады.

Қыздар танысу сайттарында ер адамдардың назарын аударып, оларды жеке кездесуге шақырған. Кездесу барысында сыбайластары кенеттен шабуыл жасап, жәбірленушілердің ақшасы мен бағалы заттарын тартып алған.

Алматы қалалық полиция департаментінің криминалдық полиция басқармасының бастығы Талант Исаевтың айтуынша, жедел-іздестіру шаралары барысында осындай алты қылмыс жасағанын мойындаған 26 күдікті ұсталды.

"Күдіктілердің барлығы қамауға алынды, тергеу амалдары жүргізіліп жатыр. Олардың басқа да қылмыстарға қатысы бар-жоғы тексерілуде. Мұндай әрекеттер тек құрбандарға ғана емес, жалпы қоғамға үлкен қауіп төндіреді", - деді Исаев.

Еске сала кетейік, бұған дейін полиция танысу сайттарын өздерінің қылмыстық әрекеттеріне пайдаланатын қылмыстық топтардың белсенділігі туралы ескертіп, интернет арқылы танысқан кезде сақ болуға шақырған.