Теміртауда зейнеткерді соққыға жықты деп күдікке ілінген жасөспірімдер екі айға қамауға алынды

Теміртауда зейнеткерді соққыға жықты деп күдікке ілінген 9 адам, оның ішінде 7 жасөспірім екі айға қамауға алынды, деп хабарлайды KAZ.NUR.KZ Қарағанды облысының прокуратурасына сілтеме жасап.

Теміртауда зейнеткерге қатысты жасалған құқыққа қайшы әрекет фактісі бойынша Қылмыстық кодекстің 191-бабы 3-бөлігінің 3-тармақшасына (тонау) сәйкес қылмыстық іс қозғалды.

"Бұлтартпау шарасының ең қатаң түрінің таңдалуына қылмыстың ауырлығы негіз болды. Күдікті ретінде танылған 9 адамның барлығы, оның ішінде 7 кәмелетке толмағандар Қылмыстық-процестік кодексінің 131-бабына сәйкес ұсталып, уақытша ұстау изоляторына қамалды. Оларға қатысты Теміртау қалалық соты екі ай мерзімге қамауда ұстау түріндегі бұлтартпау шарасын таңдады.

Қылмыстық кодекстің 191-бабы 3-бөлігіне сәйкес қылмыстық жауапкершілік 14 жастан бастап туындайтынын атап өту қажет", - деп түсіндіреді облыс прокурасының өкілдері жасөспірімдердің қамауға алынуын.

Қазіргі уақытта іс бойынша қажетті сараптамалар тағайындалып, жан-жақты және объективті тергеу жүргізіліп жатыр.

Сонымен қатар кәмелетке толмағандарды тәрбиелеу жөніндегі міндеттерді тиісінше орындамауына байланысты күдіктілердің ата-аналарына қатысты да қылмыстық іс қозғалған. Прокуратура өкілдері бұл факті бойынша бөлек тергеу жүргізіліп жатқанын хабарлады.

Ведомстводағылар өзге ақпарат Қылмыстық процестік кодекстің 201-бабына сәйкес тергеу мүддесі үшін жария етілмейтінін айтты.

Мәтіннен қате тапсаңыз, бізге жазыңыз