Алматы облысында 16 жастағы қызды моншада жасырын видеоға түсіріп алған

Желіде Алматы облысындағы қоғамдық моншалардың бірінде кәмелетке толмаған қызды әлдекім жасырын видеоға түсіріп алғаны туралы ақпарат жарияланды, деп хабарлайды KAZ.NUR.KZ.

Жағдайға қатысты Алматы облыстық полиция департаментінің баспасөз қызметі түсінік берді.

"Полиция қызметкерлері оқиғаға қатысы бар кәмелетке толмаған балаларды, оның ішінде қоғамдық моншада қызды жасырын видеоға түсірген жасөспірімді анықтап, бөлімшеге жеткізді", - деп хабарлады ведомство өкілі.

Жасөспірімдердің заңды өкілдері бала тәрбиелеу бойынша өз міндеттерін тиісінше орындамағаны үшін әкімшілік жауапкершілікке тартылды.

Сонымен қатар полицейлер әкімдік жанындағы Кәмелетке толмағандар істері жөніндегі комиссияның қарауына қосымша профилактикалық шаралар қабылдау туралы және мұндай мінез-құлыққа ықпал ететін себептер мен жағдайларды жою туралы ұсыныс енгізді.