"Бірнеше пышақ жарақаты": Алматы облысында қылмыс жасады деген күдікті іздестіріліп жатыр

Желіде кәмелетке толмаған бала жасөспірімге пышақпен тап берді деген ақпарат тарап жатыр. Қылмыстық іс қозғалып, күдікті іздестіріліп жатыр, деп хабарлайды Алматы облысы ПД баспасөз қызметіне сілтеме жасаған KAZ.NUR.KZ.

Қылмыс туралы ақпарат Egov.press Telegram-арнасында хабарланды. Ондағы мәлімет бойынша Алматы облысы Жамбыл ауданында бұған дейін сотталған азамат екінші бір ер адамға бірнеше пышақ жарақатын салған.

"Зардап шеккен де, күдікті де жасөспірім", - делінген жазбада.

Алматы облысы полиция департаменті аталған жазбаға қатысты пікір білдірді. Ведомство берген ақпаратқа сай, қылмыстық іс қозғалып, сотқа дейінгі тергеу жүріп жатыр.

"Қазіргі таңда күдіктінің қайда екенін анықтау бойынша іздестіру шаралары жүріп жатыр. Полиция оқиғаның барлық мән-жайын жан-жақты және әділ түрде анықтауға бағытталған тергеу және шұғыл әрекеттер кешенін жүзеге асырып жатыр. Кінәлі адам заңға сәйкес жауапкершілікке тартылады", - деп атап өтті полиция өкілдері.