Павлодар облысында сегіз әкім жауапкершілікке тартылды

Павлодар облысында экологиялық талаптарды бұзғаны үшін сегіз әкім әкімшілік жауапкершілікке тартылды, деп хабарлайды өңір прокуртурасына сілтеме жасаған KAZ.NUR.KZ.

Ведомствоның мәліметінше, прокуратура жүргізген талдау нәтижесінде Аққулы ауданының аумағында қатты тұрмыстық қалдықтардың жиырмадан астам полигоны анықталған, олардың ешқайсысында қоршаған ортаға эмиссияларға рұқсат жоқ.

"Экологиялық-санитариялық талаптарға сәйкессіздіктер анықталды, сондай-ақ нормативтік-техникалық құжаттаманың жоқтығы, қоршаған ортаға теріс әсердің алдын алу үшін жинақталған қалдықтардан түзілетін фильтрат пен ағын суларды бақылау жүйесінің жолға қойылмағаны белгілі болды.

Өздігінен пайда болған полигондар қоқыс газының шығарындыларын бақылау жүйесімен жабдықталмаған.

Анықталғандай, олар коммуналдық қалдықтарды бақылаусыз орналастыру салдарынан пайда болған.

Өз кезегінде жергілікті атқарушы органдар тарапынан коммуналдық қалдықтарды басқару кезінде экологиялық талаптардың сақталуы қамтамасыз етілмеген", - делінген хабарламада.

Нәтижесінде сегіз ауылдық округтің әкімдері әкімшілік жауапкершілікке тартылған. Жалпы сомасы 1,7 млн теңге көлемінде айыппұл төленген.

Мәтіннен қате тапсаңыз, бізге жазыңыз