"Бәйтерек" монументінің жанында түсірілген бейәдеп фото: астаналық студент жазаланды

Астана соты "Бәйтерек" ескерткішінің жанында бейәдеп фотоға түсіп, оны әлеуметтік желіде жариялаған жас жігітке қатысты шешім шығарды, деп хабарлайды KAZ.NUR.KZ.

Астана қаласының әкімшілік құқық бұзушылықтар жөніндегі мамандандырылған ауданаралық соты Қ.-ға қатысты ұсақ бұзақылық жасау фактісі бойынша істі қарады.

Астана соттарының баспасөз қызметінің хабарлауынша, әлеуметтік желіге жүргізілген мониторинг барысында Қ. "Бәйтерек" монументінің жанында әдепсіз сипаттағы фотосурет түсіріп, оны желіде жариялағаны анықталған, осылайша қоғамдық тәртіп пен азаматтардың тыныштығын бұзған.

"Құқық бұзушының әрекеттері "Бәйтерек" монументін пайдалана отырып, әдепсіз визуалды ишарат жасаумен көрініс тапқан, бұл оның қоғамға айқын құрметсіздік танытып, жалпыға ортақ мінез-құлық нормаларын елемегенін көрсетеді", -делінген баспасөз хабарламасында.

️Сот отырысында Қ. кінәсін толық мойындап, жасаған әрекетіне өкінетінін айтқан.

Құқық бұзушылық фактісі фотосурет және іс материалдары арқылы расталады.

Аталған баптың санкциясы 20 АЕК мөлшерінде айыппұл салуды немесе 20-дан 60 сағатқа дейін қоғамдық жұмыстарға тартуды немесе 5-тен 15 тәулікке дейін әкімшілік қамаққа алуды көздейді.

Сот қаулысымен Қ. кінәлі деп танылып, оған 5 тәулік мерзімге әкімшілік қамаққа алу түріндегі әкімшілік жаза тағайындалды.

️Жаза тағайындау кезінде сот құқық бұзушылықтың сипаты мен дәрежесін, қоғамға теріс әсер еткенін және қоғамға құрметсіздік танытуға бағытталған орынсыз мінез-құлқын, сондай-ақ құқық бұзушының жеке басын, оның ішінде 2006 жылы туған жас азамат әрі студент екенін ескерді.

Қаулы заңды күшіне енген жоқ.

Посмотреть эту публикацию в Instagram

Публикация от Астана қаласының Полиция департаменті (@police__astana)

Мәтіннен қате тапсаңыз, бізге жазыңыз