Астана іргесіндегі ауылда үш жасар баланы ат таптап кеткен

Астана іргесіндегі Талапкер ауылында ат таптап кеткен үш жасар баланың анасы кінәлі адамдардың жазалануын талап етіп отыр, деп хабарлайды "КТК" телеарнасы.

Айтуынша, қылмыстық іс қозғалғанымен, ат тізгіндеп, баласын жаншып өткен адам үйінде жайбарақат жүр. "Не кешірім сұрамады, не көмек бермеді" дейді бүлдіршіннің анасы.

"Аттың үстіндегі бала менің баламды аттап өтемін деді ме, білмеймін, қалай өтетінін. Баламның бауырын езіп жібереді. Езіп жібергенде, балам айналып түседі. Баламның миы шайқалған, қолы сынған. Кінәлі жазықсыз қалмасын деймін. Көршілер де бар, куәгерлер де бар. Ол кісілер жауап береміз деп отыр", - дейді баланың анасы Салтанат Ибраева.

Ал полиция қылмыстық іс қозғап, мән-жайды анықтап жатыр. Кінәлі адам тергелген. Қазір баланы жансақтау бөлімінен нейрохирургияға ауыстырған. Жағдайы әлі  ауыр. Болған жағдайдан қатты шок алған көрінеді. Ұйқы безі зақымданған, басына зақым келген.

Анасының айтуынша, жедел жәрдемге хабарласа алмаған соң, баланы ауруханаға өздері жеткізіпті. Оқиға 5 маусымда кешкі алты шамасында болған. 20-25 жастағы жігіттер балалар жүрген көшеде ат жарыстырып жүріпті.

"Қылмыстық іс қозғалды. Бала медициналық мекемеге жеткізілді. Істің мән-жайын анықтау үшін тергеу жүріп жатыр", - дейді Ақмола облысы полиция департаментінің ерекше тапсырмалар бойынша аға инспекторы Әсем Әбдірахманова.

Мәтіннен қате тапсаңыз, бізге жазыңыз