Павлодарда көпқабатты тұрғын үйден өрт шықты: Бір бала ауруханаға түсті (фото)

Павлодарда көпқабатты тұрғын үйден өрт шықты. Төтенше жағдайлар департаментінің мамандары төрт бала мен бір ересек адамды құтқарды, деп хабарлайды Pavlodarnews.kz.

Павлодар облыстық төтенше жағдайлар департаментінің мәліметінше, бүгін, 16 маусымда 16:04-те "101" пультіне Павлодар қаласы Жаяу Мұса көшесінде орналасқан тұрғын үйде өрт болғаны туралы хабарлама түскен.

"Өрт сөндірушілер он қабатты тұрғын үйдің сегізінші қабатында бір бөлмелі пәтерде жалпы аумағы 6 шаршы метр алаңда өрт болып жатқанын анықтады. Сондай-ақ тоғызыншы қабатта бір бөлмелі пәтерде 3 шаршы метр алаңда пластикалық балконның жақтауы жанса, оныншы қабаттағы бір бөлмелі пәтерде жоғары температураның әсерінен пластикалық балкон жақтауы балқып кетті", - делінген хабарламада.

Арнайы мамандардың 8-қабаттағы пәтердің сыртқы металл есігін бұзып ашқаны белгілі болды.

Барлау барысында 2015 жылғы бала қонақ бөлмесіндегі төсекте ес-түзсіз күйде табылған.

№ 3 өрт сөндіру бөлімінің аға өрт сөндіруші-құтқарушысы Дастан Сүлейменов балаға "Фенист" құрылғысын салып, далаға көтеріп шығарған.

Зардап шегуші қазіргі уақытта облыстық балалар ауруханасына жатқызылды.

Сонымен қатар ведомство қызметкерлері 8-9-қабаттан 3 бала мен 1 ересек адамды құтқарды және 25 адамды, оның ішінде 10 баланы эвакуациялады.

Қызыл жалын 16:38-де толығымен ауыздықталды.

Қазіргі уақытта өрттің шығу себебі анықталып жатыр. 

Мәтіннен қате тапсаңыз, бізге жазыңыз