"Үш газ баллоны жарылған": Астанада Хан-Шатыр маңындағы ғимарат өртенді (видео)

Астананың сол жағалауындағы ғимараттардың бірінде өрт шықты. Әлеуметтік желіде оқиға орнынан түсірілген кадрлар пайда болды, деп хабарлайды қалалық Төтенше жағдайлар департаментінің баспасөз қызметіне сілтеме жасаған KAZ.NUR.KZ.

Бейнежазба Telegram Astanovka_98 арнасында пайда болды. Куәгерлер жарылыс дыбысын естігендерін айтады.

Елордалық төтенше жағдайлар департаментінің мәліметінше, Мұхамедханов көшесінде салынып жатқан ғимарат өртенген. Оқиға орнына екі өрт сөндіру бөлімі – жеке құрамның 19 адамы мен 4 техникасы шықты.

Куәгерлердің айтуынша, жарылыс бірнеше рет болған.

ТЖД мәліметіне сүйенсек, 3 газ баллоны жарылған және 15 рулон шатыр материалы өртенген. Өрт бүгін сағат 16:28-де шыққан және шамамен жарты сағаттан кейін сөндірілді.

Мәтіннен қате тапсаңыз, бізге жазыңыз