Алматы облысында Талғар өзені деңгейінің күрт көтерілуіне байланысты демалушылар эвакуацияланды

Жұма, 21 шілде күні таулы аймақтарда жауған жауын-шашын салдарынан Талғар өзенінің деңгейі көтерілді, деп хабарлайды Алматы облысы төтенше жағдайлар департаментінің баспасөз қызметіне сілтеме жасаған KAZ.NUR.KZ.

Төтенше жағдайлар департаменті "Большая Поляна" гидробекетінің мәліметтеріне сүйене отырып, Сол Талғар өзенінің деңгейі тоқтаусыз жауын салдарынан секундына 18 текше метрге көтерілгенін мәлімдеді.

"Қазіргі уақытта Талғар өзеніндегі су деңгейі секундына 23,5 текше метрді құрайды (судың сыни деңгейі секундына 40 текше метр).

Талғар бөгеті гидротехникалық құрылысының су өткізу қабілеті секундына 70,5 текше метрді құрайды", - деп хабарлады өңірлік төтенше жағдайлар департаменті.

Ведомствоның мәліметінше, қазір су транзиттік режимде өтуде. Бірақ өзенде қосымша бақылау бекеттері қойылған. Гидротехникалық құрылыстың жоғарғы жағында демалып жатқан адамдар эвакуацияланды.

"Жағдай жергілікті атқарушы органдарының, облыстың төтенше жағдайлар департаментінің, Қазселденқорғау" мемлекеттік мекемесінің тұрақты бақылауында", - деп мәлімдеді төтенше жағдайлар министрлігі.

Мәтіннен қате тапсаңыз, бізге жазыңыз