Ақтөбе облысында қатты дауыл тұрып, бірнеше ғимараттың шатырын ұшырып әкетті (фото)

Ақтөбе облысы Қобда ауданында қатты желдің салдарынан әлеуметтік нысандарға зақым келді. Бірнеше көше жарықсыз қалды, деп хабарлайды KAZ.NUR.KZ тілшісі.

Қобда ауданының орталығында қатты желден мектеп, көпсалалы колледж бен тұрғын үйдің шатыры ұшты. Аудан орталығында тал құлаған көшелерде электр жүйесі қалпына келтіріліп, бүлінген нысандар жөнделіп жатыр.

"7 тамыз, кешкі сағат 19:25 шамасында қатты дауыл болды. Арты жаңбырға ұласты. Қобда ауданы орталығындағы сегіз пәтерлі екі қабатты үйдің шатырын толықтай ұшырып алып кетті. Ол тұрғын үй-коммуналдық шаруашылығы балансындағы үй. Қазір айналаны тазарту жұмыстары жүріп жатыр. Сонымен қатар мектеп пен көпсалалы колледждің шатырын ұшырып әкетті. Адамдар аман. Қалыпқа келтіру жұмыстарын жергілікті әкімдік жасайды", - деді Қобда ауданының әкімі Ізгілік Тынымгереев.

Ауданда қатты жел кезінде жарақат алған адам жоқ.

Аудан әкімінің айтуынша, кеше төрт көшенің жарығы қосылған. Қазір тағы екі көшеді электр желісін қалпына келтіру жұмыстары жүріп жатыр.

Автор: Ардақ Ерубаева