Қостанай облысында дала өртін сөндіруге тікұшақ тартылды (видео)

Қостанай облысында құтқарушылар дала өртін оқшаулады. Осылайша, олар 10 мың гектар жерді шарпыған оттың ары қарай таралуына жол бермеген, деп хабарлайды Төтенше жағдайлар министрлігіне сілтеме жасаған KAZ.NUR.KZ.

Ведомствоның Telegram-дағы арнасында жарияланған мәліметке сәйкес, Алтынсарин ауданында Лихачевка ауылынан 10 км қашықтықта ашық аумақта құрғақ шөп жанған. Желдің екпіні 25 м/с дейін күшейгендіктен, Лермонтов орманшылығының орман учаскелеріне өрттің таралу қаупі туындаған.

"Өрт сөндіру жұмыстарын ТЖМ және орман шаруашылығының қызметкерлері жүргізді. Сондай-ақ ҰҚК авиациялық қызметінің су төгу құрылғысы бар тікұшақ тартылды. Авиация 4 рет жалпы көлемі 8 тоннадан астам су төкті", - делінген ТЖД хабарламасында.

Осылайша, құтқарушылар үйлесімді іс-қимылдың арқасында 10 мың гектар алаңдағы өрт таралуының алдын алған. Қайтыс болғандар мен зардап шеккендер жоқ.

Мәтіннен қате тапсаңыз, бізге жазыңыз