"Тал түсте үйімнің терезесін сындырып кірмек болды": Ұзынағаштағы оқиғаға қатысты жедел-іздестіру шаралары жүріп жатыр

30 қазанда тал түсте белгісіз біреулер Алматы облысы Ұзынағаш ауылы тұрғынының үйіне терезесін сындырып кірмек болған. Сондай-ақ тұрғын ауласында тұрған көлігі де бүлінгенін видео арқылы көрсетті. Облыстық полиция департаментіндегілер бұл факт аудандық полицияда тіркелгенін растады, деп хабарлайды KAZ.NUR.KZ тілшісі.

Аталған видео Instagram-дағы abdulla_kz_kz парақшасында жария болды. Бейнежазбада әлдекімдердің терезені шағып ішке енбек болған кезі түсірілген. Автор ұрыларды танитынын айтқан.

"Алматы облысы Ұзынағаш ауылында ұрылар тал түсте ауламда тұрған көлігімді тонап, үйімнің терезесін сындырып кірмекші болды. Мен ол ұры жігіттерді танимын, олардың мықты жерлерде істейтін көкелері бар, бұрындары да осындай әрекеттерімен ұсталған", - дейді автор.

Үй иесі өлтіріп кете ме деп қорыққанын да айтады. Видео авторы полицияға шағымданған.

"Видеода үйге кіріп келе жатқанда жарықты ертерек жаққаным – оларды танып қойсаң, пышақтап кетуі мүмкін, олар қарумен жүреді, өлтіріп кете ме деп қорықтық", - дейді үй иесі.

Алматы облыстық полиция департаменті аталған жайтқа қатысты түсініктеме берді.

"Бұл факт Жамбыл аудандық полициясында тіркелді. Қазіргі таңда болған жағдайдың барлық мән-жайын анықтау үшін жедел-іздестіру шаралары жүріп жатыр. Басқа ақпарат тергеу мүддесіне сәйкес жария етілмейді", - делінген полиция департаментінің хабарламасында.