Алматыда таңғы уақытта ірі өрт болды: оқиға орнына ТЖД басшысы келді (фото)

Бүгін таңертең Алматыда алты қабатты әкімшілік ғимаратта өрт шықты. Оқиға орнына Төтенше жағдайлар департаментінің басшысы Нұрлан Атығаев келді, деп хабарлайды Төтенше жағдайлар министрлігіне сілтеме жасаған KAZ.NUR.KZ.

Министрліктің Telegram-каналында хабарланғандай, өрт Жетісу ауданындағы Новгородская көшесіндегі әкімшілік ғимаратта шыққан.

Төтенше жағдай орнына жоғары дәрежелі құтқарушылар келді.

"Өрт сөндіру есептоптарының жедел келуіне қарамастан, өрт өршіп кеткен. Ғимараттың шатыры мен қаптамасы толығымен жалындап жанып жатты. Өрттің таралуына лак-бояу өнімдері бар ыдыстардың жарылысы, сондай-ақ өрт туралы кеш хабарланғаны ықпал етті.

Өртті сөндіру ғимарат ішінде лак-бояу өнімдерінің болуына байланысты қиындай түсті", - делінген ТЖМ хабарламасында.

Өрт орнында Алматы ТЖД басшысы полковник Нұрлан Атығаевтың басшылығымен жедел өрт сөндіру штабы жұмыс істеп, үздіксіз су беру ұйымдастырылды. Сондай-ақ өртті сөндіруге ТЖМ автопоезды тартылды.

Өрт 06:46-да сөндірілді. Зардап шеккендер жоқ.

Мәтіннен қате тапсаңыз, бізге жазыңыз