Алматыдағы "Горный Гигант" ықшамауданында ірі өрт сөндірілді

ТЖМ құтқарушылары Алматы қаласы Медеу ауданының "Горный гигант" ықшамауданындағы жеке тұрғын үйдегі өртті сөндіруде жоғары дәреже бойынша жұмыс істеді, деп хабарлайды Төтенше жағдайлар министрлігіне сілтеме жасаған KAZ.NUR.KZ.

Ведомствоның ресми Telegram-каналында хабарланғандай, өрт көрші ғимараттың шатырына ауысқан.

"Жергілікті жерде жедел штаб ашылып, 3 жауынгерлік учаске ұйымдастырылды. Оқпандар енгізілді, судың үздіксіз берілуі қамтамасыз етілді", - делінген ТЖМ хабарламасында.

Шұғыл өзара әрекет ету қызметтері оқиға орнында жағдайды бақылауға алған. Зардап шеккендер туралы ақпарат түскен жоқ. Өрт шамамен 1000 ш. м. алаңда сөндірілді.

Төтенше жағдай туралы хабарлама кеш келгендіктен, өртті сөндіру қиындай түскен: өрт сөндірушілер келген кезде өрт бірталай аумақты шарпып үлгерген. Жалынның тез таралуына ықпал еткен жапсарлас салынған ғимараттардың құрылымдық ерекшеліктері де қосымша қиындықтар тудырған.

Өрттің себебі анықталып жатыр. Өртті сөндіру барысында ТЖМ құтқарушылары екі қабатты тұрғын үйден мысықты алып шығарды. Видеода мысық өзін құтқарған өрт сөндірушіні жібергісі келмей жатқаны көрінеді.

"Бұл сәт жұмыс барысында құтқарушылар адамдарды ғана емес, үй жануарларын да назардан тыс қалдырмайтындығының айқын дәлелі", - делінген министрлік хабарламасында.

Мәтіннен қате тапсаңыз, бізге жазыңыз