"Кішкентайларын көтеріп алып шықты": Абай облысында өрт ошағына жақын жазғы лагерьден 190 бала эвакуцияланды
Жарияланған күні:
Абай облысында орман өртеніп жатыр. Полиция қызметкерлері өрт ошағына жақын орналасқан балалар лагерінен 190 баланы және 20 қызметкерді қауіпсіз жерге эвакуациялады, деп хабарлайды KAZ.NUR.KZ Polisia.kz ақпараттық порталына сілтеме жасап.
ІІМ-нің ақпараттық медиа-порталының мәліметінше, өрт туралы хабарлама түскен алғашқы минуттардан бастап полицейлер лагерьге шұғыл жетіп, эвакуация жұмыстарын бастады.
Балалар арасында үрей туғызбау үшін оларды сабырмен әрі ұйымдасқан түрде шығарды. Ең кішкентайларын қызметкерлер көтеріп алып шығып, жұбатып, қауіпсіз жерге дейін алып жүрді.
"Қазіргі уақытта полиция қызметкерлері күшейтілген режимде қызмет атқаруда. Қауіпті аумақ қоршауға алынып, өрт ошағына апаратын жолдар жабылды, арнайы техниканың кедергісіз қозғалысы қамтамасыз етілуде. Полицейлер қоғамдық тәртіпті сақтап, эвакуацияланған тұрғындардың мүлкін күзетіп тұр", - деп жазады басылым.
Жұмыс төтенше жағдайлар министрлігі, экология және табиғи ресурстар министрлігі, қорғаныс министрлігі және басқа да қызметтермен бірлесіп тәулік бойы жүргізілуде.
Ішкі істер министрлігі азаматтарды төтенше жағдайлар қызметі қызметкерлерінің талаптарын қатаң сақтауға, қауіпті аймаққа жақындамауға және арнайы техниканың жұмысына кедергі келтірмеуге шақырады.
Еске сала кетейік, бүгін, 16 шілдеде "Семей орманы" мемлекеттік орман табиғи резерватында өрт шыққанын хабарлағанбыз. Қазір өрт сөндіру жұмыстары жүргізілуде.
Мәтіннен қате тапсаңыз, бізге жазыңыз
