Алматыда автобустың қатысуымен болған жол апатынан үш әйел қаза тапты (фото)

Алматыдағы Алатау ауданында шағын хэтчбек жолаушылар автобусымен соқтығысып, үш келіншек қаза тапты деп хабарлайды KAZ.NUR.KZ.

Қанды оқиға Жаужүрек көшесінде орын алған. Sputnik Қазақстанның мәлімдеуінше, Renault көлігіндегі келіншек рөлге ие бола алмай, автобусқа толығымен "кіріп" кеткен.

Куәгерлер жеңіл көлік Жаужүрек көшесімен батысқа қарай кетіп бара жатқанын айтады. Трудовик ауылы маңында ол шығысқа бағыт алған №15 автобуспен соқтығып қалады.

Соққының қатты болғаны соншалық, жеңіл көлік жолдың жиегіне ұшып кеткен. Ал Renault жүргізушісі көлікті "тыңдата алмағанын" мойындап отыр.

Автобуспен соқтығысу салдарынан француз көлігінің жолаушылары қаза тапты. Қанды оқиға 1960,1978 және 1988 жылы туған келіншектердің өмірін алып кетті.

Renault көлігінде отырған бір адам аман қалды. Қазір ауруханада жатқан оның жағдайы ауыр деп бағалануда.

Көліктен қаза тапқандардың денесін құтқару қызметінің қызметкерлері шығарған. Оларға арнайы құралдардың көмегі қажет болыпты.

Естеріңізге сала кетейік, Алматы қаласында жаппай төбелескен жігіттер видеоға түсіп қалды. Қалалық Полиция департаменті текетірестің 20 желтоқсанға қараған түні болғанын хабарлады. Қазір екі күдікті ұсталды. Ал жәбірленуші медициналық ем қабылдаған соң үйіне жіберілді.

Мәтіннен қате тапсаңыз, бізге жазыңыз