Алматы облысында болған жантүршігерлік жол апатынан бес адам қаза тауып, үш бала зардап шекті

Алматы облысында Audi мен Renault көліктерінің соқтығысуы салдарынан бес адам қаза тапты. Оқиға орнынан үш бала ауруханаға жеткізілді. Жантүршігерлік жол апатының мән-жайын NUR.KZ тілшісіне облыстық полиция департаменті хабарлады.

Жол апаты орнында түсірілген видео әлеуметтік желіде тарап жатыр.

Кадрда екі көліктің соқтығысқаны түсірілген. Көліктердің жанында қайтыс болған адамдардың денесі жатыр.

"Жүргізуші Алматы – Шонжы тас жолында қарсы жолаққа шығып кетіп, алдындағы көлікпен бетпе-бет соқтығысқан. Салдарынан 4 адам қаза тауып, 1 бала жансақтау бөлімінде жатыр", – делінген хабарламада.

Полицейлер жол апатын растады.

Құқық қорғау органдарының мәліметінше, жол апаты 6 тамыз күні Еңбекшіқазақ ауданында Audi және Renault автокөліктерінің қатысуымен болған.

"Audi рөлінде 22 жастағы жүргізуші болған, ол "Алматы – Көкпек – Көктал" автожолының 181 шақырымында рөлді басқара алмай, қозғалыстың қарсы жолағына шығып, Renault автокөлігімен соқтығысқан.

Нәтижесінде оқиға орнында 5 адам қаза тапты. Сондай-ақ сол жерден Шелек ауылының ауруханасына түрлі жарақатпен үш кәмелетке толмаған бала жатқызылды", – деп хабарлады Алматы облысы ПД баспасөз қызметі.

Аталған факті бойынша Қылмыстық кодекстің 345-бабы 4-бөлігі (Абайсызда екі және одан да көп адамның өліміне әкеп соққан ЖҚЕ бұзу) бойынша сотқа дейінгі тергеу жүргізілуде. Барлық қажетті сараптамалар тағайындалды.

Мәтіннен қате тапсаңыз, бізге жазыңыз