Алматыда жантүршігерлік жол апатынан үш адам қаза болды

Өткен түні Алматы қаласында жол апатынан үш адам көз жұмды, деп хабарлайды KAZ.NUR.KZ қалалық полиция департаментінің баспасөз қызметіне сілтеме жасап.

Жол апаты болған жерден кадарлар Instagram-пабликтердің бірінде тарады.

Алматы қалалық полиция департаментінің мәліметінше, жол апаты 26 қаңтар күні түнгі сағат 23:30 шамасында Әуезов ауданында болған.

"Honda көлігінің жүргізушісі, 2003 жылы туған Р. есімді азамат Саин көшесімен солтүстік бағытта келе жатып, рульді басқара алмай, жолдың шетіндегі жарықтандыру шамының бағанасына соғылған", – делінген полиция хабарламасында.

Жол апаты салдарынан жүргізушінің өзі және көлік салонында болған 2003 және 2004 жылы туған екі жолаушы мерт болған.

"Бұл дерек Қылмыстық кодекстің 345-бабының 4-бөлігі бойынша сотқа дейінгі тергеп-тексерудің бірыңғай тізіліміне тіркелді. Сараптамалар тағайындалды", – деп қосты құзырлы орган.

Еске салайық, бірнеше күн бұрын Алматыдағы әл-Фараби даңғылында болған жаппай жол апаты салдарынан үш адам қаза тапқан еді.