Алматы облысында 22 жастағы полиция қызметкері мерт болды

Алматы облысында жол апатынан 22 жастағы полиция қызметкері мен екінші бір көліктің жүргізушісі оқиға орнында көз жұмды. Бұл туралы аймақтың полиция департаментінің баспасөз қызметі хабарлады, деп жазады KAZ.NUR.KZ.

Ведомствоның мәліметінше, 7 ақпан күні сағат 17.35-те Lada Priora автокөлігінің 37 жастағы жүргізушісі "Сарыбастау — Үлгілі" тас жолымен келе жатып, жолдың 10 шақырымында қарсы жолаққа шығып кетіп, 22 жастағы Үшқоңыр ауылының тұрғыны басқарған Lada көлігімен бетпе-бет соқтығысқан.

Апат салдарынан екі жүргізуші де алған жарақаттарынан оқиға орнында көз жұмды.

Аталған факті бойынша Жамбыл аудандық полиция бөлімінде Қылмыстық кодекстің 345-бабының 4-бөлігі бойынша қылмыстық іс қозғалды. Қажетті сараптамалық тексерулер тағайындалды.

"Lada көлігінің 22 жастағы жүргізушісі Қарасай ауданына қарасты ОҚПБ учаскелік полиция инспекторы болған. Жол-көлік оқиғасы кезінде ол кезекті еңбек демалысында болған", — деп хабарлайды Алматы облысы ПД баспасөз қызметі.

Мәтіннен қате тапсаңыз, бізге жазыңыз