Астанада бес көліктің қатысуымен ірі жол апаты болды (видео)

Бүгін Астанада әл-Фараби даңғылының бойында бес көліктің қатысуымен жаппай жол апаты болды. Зардап шеккендер бар, деп хабарлайды KAZ.NUR.KZ елордалық ПД баспасөз қызметіне сілтеме жасап.

Ведомствоның мәліметінше, жол апаты бүгін, 6 маусымда сағат 08:30-да Әл-Фараби даңғылында болған.

"Lada Largus көлігін тізгіндеген 22 жастағы жүргізуші Әл-Фараби даңғылымен Пушкин көшесіне қарай келе жатып, MAN және Audi 100 маркалы көлігімен соқтығысқан", – делінген хабарламада.

Сондай-ақ полицияның мәліметінше, екі көлікпен соқтығысқаннан кейін Lada Largus жүргізушісі қарсы жолаққа шығып кетіп, Toyota Corolla көлігімен соқтығысқан. Одан кейін Lada Largus көлігінің дөңгелегі ұшып кетіп, ВАЗ-21713 көлігіне соғылған.

"Жол-көлік оқиғасы салдарынан Toyota Corolla көлігінің 42 жастағы жүргізушісі дене жарақатымен ауруханаға жатқызылды. Lada Largus жүргізушісі медициналық көмектен кейін үйіне жіберілді", – деп толықтырды ведомстводан.

Аталған факті бойынша тергеу жүріп жатыр.

Мәтіннен қате тапсаңыз, бізге жазыңыз