"560 пәтер газсыз қалды": Ақтөбеде газ құбырын тарту жұмыстары кезінде қазылған шұңқырға көлік түсіп кетті
Опубликовано:
Ақтөбеде газ тарту жұмыстары жүргізіліп жатқан шұңқырға көлік түсіп кетті. Нәтижесінде газ құбырына зақым келді. Қалада сегіз тұрғын үй кешені, яғни 560 пәтер газсыз қалды, деп хабарлайды KAZ.NUR.KZ тілшісі.
Оқиға Ақтөбе қаласының Алтын Орда ауданында тіркелді. Облыстық ПД мәліметіне сүйенсек, көлік жүргізген әйел алкогольдік масаң күйде болған.
"3 қазан сағат 6:30-да Мercedes көлігінің 39 жастағы жүргізушісі шұңқырға түсіп кетті. Жүргізуші әйел зардап шеккен жоқ. Жүргізілген сараптама қорытындысы жүргізушінің алкогольдік ішімдік ішкенін көрсетті. Хаттама жасалып, іс сотқа жіберілді", - деп хабарлайды облыстық ПД.
Ақтөбе қаласы әкімдігінің хабарлауынша, "Сұңқар" тұрғын үй кешеніне газ тарту үшін жеке газ қызметі қазу жұмыстарын жүргізген. Шұңқыр айналасы қоршалған.
"Бұл тұрғын үй кешенінің жұмысын Мемлекеттік сәулет-құрылыс басқармасынан сұратып, мобильдік топ заңдылығын тексереді. 560 пәтер, 8 үй газдан үзілген. Қазіргі уақытта апаттық қалпына келтіру жұмыстары аяқтау сатысында", - деді Ақтөбе қаласы әкімдігі өкілдері.
Автор: Ардақ Ерубаева
Мәтіннен қате тапсаңыз, бізге жазыңыз