Алматы облысында жол бойында полицейді көлік қағып кетті

20 желтоқсанда, Алматы облысы полициясының алдын ала мәліметінше, Toyota Camry жүргізушісі көктайғақта көлікті басқара алмай, полиция инспекторын қағып кеткен. Бұл туралы KAZ.NUR.KZ Ішкі істер министрлігі таратқан мәліметке сүйене отырып хабарлайды.

Ведомствоның Telegram-дағы арнасында жариялаған мәліметке қарағанда, жол апаты кезінде полиция инспекторы көз жұмған.

"Алдын ала мәліметтер бойынша, 20 желтоқсанда Toyota Camry 35 жүргізушісі Алматы-Өскемен автожолының 42 шақырымында келе жатып, көктайғақ жағдайында рульді басқара алмай, облыстық патрульдік полиция батальоны қызмет инспекторына қағып кетіп, сонан соң инерциямен Hyundai Elantra қызметтік автокөлігімен соқтығысқаны анықталды. Жол-көлік оқиғасы салдарынан полиция қызметкері оқиға орнында көз жұмды", - деп хабарлады облыстық полиция департаменті өкілдері.

Жол-көлік оқиғасы бойынша тергеу жүріп жатыр.

Өңір полициясы жүргізушілерге жол қозғалысы ережелерін сақтауға, әсіресе тұман және көктайғақ кезінде сақ болуға шақырды.

"Сіздің ұқыптылығыңыз бен сақтығыңыз жол қауіпсіздігінің кепілі екенін ұмытпаңыз", - деп ескертеді полицейлер.