Алматыдағы жол апаты: Zeekr автокөлігінің жүргізушісі ауруханадан тергеу изоляторына жеткізілді

Алматыдағы әл-Фараби даңғылында болған жол апатына қатысты жаңа деректер жарияланды. Zeekr көлігінің жүргізушісі ауруханадан тергеу изоляторына ауыстырылды, деп хабарлайды KAZ.NUR.KZ қала полициясына сілтеме жасап.

Полиция департаментінің баспасөз қызметінің мәліметінше, үш адамның өмірін қиған жол-көлік оқиғасына қатысты іс бойынша күдіккті деп танылған ZEEKR автокөлігінің жүргізушісі тергеу изоляторына этапталды.

"Бұған дейін күдікті медициналық мекемеде айдауыл күзетінің бақылауында болған және соттың санкциясымен қамауға алынған.

Қазіргі уақытта ол қылмыстық іс аясында қамауда ұстау үшін тергеу изоляторына жеткізілді", - деді ПД баспасөз қызметі өкілдері.

Естеріңізге сала кетейік, 21 наурызда Алматыдағы әл-Фараби даңғылында жантүршігерлік жол апаты болып, салдарынан үш адам қаза тапты.

Полиция Zeekr көлігінің жүргізушісі қарсы қозғалыс жолағына шығып кетіп, Mercedes көлігімен соқтығысқанын мәлімдеді.

26 наурызда Zeekr жүргізушісін соттың санкциясымен қамаққа алу шарасы қабылданды.

Сондай-ақ жол апатынан кейін Алматы полиция департаментіндегі бірқатар лауазымды тұлға қызметінен босатылғаны хабарланды.

Мәтіннен қате тапсаңыз, бізге жазыңыз