Экс-депутат Бақытжан Базарбек өзі ұшыраған жол апатына қатысты пікір білдірді

Мәжілістің бұрынғы депутаты Бақытжан Базарбек таяуда Жамбыл облысында болған жол-көлік оқиғасына қатысты пікір білдірді, деп хабарлайды KAZ.NUR.KZ.

"Құрметті достар! Менің қатысуыммен болған жол-көлік оқиғасына қатысты көптеген болжам мен түрлі әңгімеге жауап бере алмаймын және көп нәрсені жазуға да мүмкіндігім жоқ. Қозғалған сотқа дейінгі тергеп-тексеру аясында мен және жұбайым сотқа дейінгі тергеп-тексеру деректерін жария етпеу туралы қолхат бердік.

Тергеу амалдары жалғасып жатыр. Қазір қажетті сараптамалардың жүргізілуі күтілуде. Тергеп-тексеру органдары заң талаптарына сәйкес болған оқиғаның барлық мән-жайына объективті әрі әділ баға береді деп сенемін", - деп жазды экс-депутат Facebook-тегі парақшасында.

Оның айтуынша, қазір өзі үшін ең бастысы – зардап шеккен азаматтың, оның жақындары мен туыстарының қасында болып, қажетті көмек көрсету.

"Біз бірнеше күн бойы іс жүзінде ұйықтамай, оның туған-туыстарымен бірге оның сауығып кетуін тілеп, дұға жасап отырмыз.

Көрсетілген шұғыл медициналық көмек үшін аудандық аурухананың барлық дәрігеріне, сондай-ақ Денсаулық сақтау министрлігі мен облыстық денсаулық сақтау басқармасына ерекше алғысымды білдіремін.

Әлеуметтік желілерде қазірдің өзінде түрлі нұсқалар мен алып-қашпа әңгімелер тарап жатыр. Баршаңызды асығыс қорытынды жасамауға және тек ресми ақпарат пен тергеу нәтижелеріне сенуге шақырамын.

Осы қиын күндерде алаңдап, қолдау көрсетіп жатқан баршаңызға рахмет!" - деді Бақытжан Базарбек.

Мәтіннен қате тапсаңыз,бізге жазыңыз